SEGUNDA XORNADA DO BAR-OUTA
Como xa sabedes, onte foi a segunda xornada de apertura do Bar-Outa.
En infantil apuntámonos a colaborar con esta iniciativa do alumnado de 6º de EP para recadar fondos para a súa excursión de fin de curso.
No día de onte os panos dos nosos bocadillos e biscoitos eran de cor negra xa que a ANPA BAROUTA colaborou deste xeito coa campaña do #DíaInternacionalPolaEliminaciónDaViolenciaContraAsMulleres#
Aínda que moitas nenas e nenos seguen a preferir os bocadillos de crema de cacao e o biscoito, tamén hai moitas e moitos que xa se apuntan ao bocadillo de chourizo e de queixo.
SAÍDA POLA CONTORNA
Aproveitando o tempo solleiro de hai unha semana puidemos saír de novo ao monte para recoller elementos naturais para empregar nos ambientes e facer diferentes actividades.
Recollemos paus, castañas, follas ... e sorprendentemente quixemos recoller landras pero ... NON HABÍA!
O que si atopamos foron varios cogomelos de diferentes tamaños! No monte hai unha chea deles!
E tamén vimos un carballo pequeno! Estaremos atentas e atentos a como vai medrando!
CINEMACRIANZA E CINEMAESCOLA
O xoves 15 de novembro as nenas e nenos de 6º de EI foron á Casa da Cultura do Milladoiro para asistir ao festival internacional de cine infantil "CINEMACRIANZA" onde puideron ver varias curtametraxes de temáticas diversas como:
-"O cazador de árbores xigantes"
-"O corazón da casa"
-Achoo!
-"O derradeiro libro da terra"
- ...
E este pasado mércores día 21, todo o alumnado de infantil, participou no programa CINEMAESCOLA, ao que a SGAE quere dar difusión.
Era a primeira saída das nenas e nenos de 4º de EI e acompañounos Bernardo que pasou por moitas mans pero a encargada de levalo ata o autobús, sentalo e poñerlle o cinto foi Livia.
Nesta primeira saída sentámonos para merendar todas e todos xuntos.